العفريت قصة جن

الأحد فبراير 26, 2017 6:25 am

في بيت كل واحد منا حاجات كتير حقيقه مش بنقدر نشوفها عالم تاني مش بيكون متشاف بعنينا . انا هحكيلكم قصتي اللى حصلت معايا ..

انا شاب عندي 20 سنه واول مره اكتشف العالم الغريب ده كان في عيد ميلادي . يوم 12-12 اللى هوه زي النهرده

كان بدايه حياه جديده ودنيا جديده وعالم جديد خالص .

دايما من صغري كنت حاسس ان الدنيا دي مش معقوله لينا احنا بس ،كنت عارف ان فيه حاجات اكبر مننا اووي وقوي خارجيه وحاجات كتير

مش عارف ده كان بسبب الافلام اللى بسمعها ولا ايه . بس انا وانتم وكل الناس . بيحصلنا الحاجات اللى هقول عليها دي

وانا ماشي احس ان في حد ماشي ورايا واجي ابص ملاقيش حاجه .

لو قاعد احس ان في هوا سخن جنب وداني وزي ما يكون حد بيتنفس جنبي . او ساعات ابقي نايم واقوم من النوم حاسس احساس غريب

زي ما يكون حد صحاني مع اني قمت لوحدي . لما بدخل الحمام ابقي حاسس ان في حد بيبص عليا

كلها لحد دلوقتي كانت حاجات حاسس بيها وبس .

ويوم عيد ميلادي كالعاده احتفلت بيه لوحدي اصل انا مليش اصحاب كتير اوي او اقدر اقول ان مليش اصحاب اصلا .

كانوا بيخافوا مني او مفكرني مجنون كنت دايما لما اقعد معاهم اقولهم في حاجات غريبه في بيت كل واحد فينا انتم مش بتلاحظوها

واقعد اقلهم علي تحليل للامور دي وده كان بيخليهم يبعدوا عني .

اليوم الموعود يوم عيد ميلادي احتلفت بيه وبعد ما انتهي الاحتفال انا طول ما انا قاعد حاسس نفس اللى بحسه كل يوم بس النهرده قررت انا لازم اكتشف العالم الغريب ده هعمل اي حاجه

بدأت ادخل النت واقرى عن حاجات كتير وكلام غريب مش فاهمه كنت حاسس بحاجات غريبه بتحصلي وانا بقرا جسمي بيسخن وهوا جنب وداني

مكنتش خايف متوقع اي حاجه هتحصلي لاني فعلا عاوز اكتشف الحاجات دي . لحد ما وصلت لكتاب اسمه شمس المعارف .

وبدأت اقرا فيه كتير طفيت النور وقعدت علي سريري ومسكت تلفوني وبدأت أقرأ في الكتاب . قريت كلام كتير اوي . وصلت لربع الكتاب تقريبا

كان في طقوس وطلاسم وحاجات غريبه لازم اعملها وبدأت أقرأ الطلاسم دي . للحظه كده بدأت أحس بخوف بسيط في قلبي بس عادي . مكنتش مركز اوي يعني

حسيت كده مره واحده ان السرير تقل جنبي زي ما يكون حد طلع قعد عليه . ده وانا كنت بقرا طلاسم غريبه وبرده موقفتش وفضلت مكمل .

لحد ما حسيت حط ايده علي كتفي . وقفت ثواني عن اللى بقراه . وبعدين كملت مبصتش جنبي حتي علشان اعرف اي ده .

فضلت صاحي 8 ساعات بقرا الكتاب من الساعه 7 العشاء لحد الساعه 5 الصبح .

خلصت الكتاب من هنا حطيته جنبي وشديت الغطا بتاعي ونمت .

وبدأ حوار ساعتين مع صديقي العفريت

شوفت في الحلم حاجه كده مش عارف ليها ملامح زي دخان أو طيف . كنت بتكلم معاه وانا مش خايف منه بسأله علي حاجات كتير

وكانت اسئلتي ليه

السؤال الاول

انتم موجودين فين . انت في بيت كل واحد مننا صح . ؟

– احنا مش بس في بيت كل واحد مننا احنا مع كل واحد انا قاعد جنبك وانت بتاكل وانت في الحمام حتي وانت نايم ببقي نايم حضنك لو كنت خايف .

لو عيطت ومفيش حد مسح دمعتك انا ببقي واخدك في حضني وبمسح دموعك . بص وراك كده انا واقف وراك برده دلوقتي . احنا حواليك في كل مكان ,

السؤال الثاني

ممكن تأذونا ؟ او تعملوا حاجات تخلينا نخاف. ؟

فيه منا اللى يمكن يلعب معاك ويخوفك . لما تحس ان فيه حد ماشي وراك فده واحد مننا بيراقبك بيستني الفرصه علشان ياخدك عالم تاني خالص .

ولو رحت مش هترجع وبيبقي قوته خوفك طول ما انت خايف يمكن في اي وقت ياخدك ومتعرفش هتروح فين .

بنبقي قاعدين جنبك لما تحس ان في هوا سخن في ودانك فده واحد مننا قاعد جنبك بس قريب اوي منك لدرجه ان نفسه انت حاسس بسخونته .

ممكن وقتها لو بصيت في المرايه في اللحظه دي يخبطك او يعمل فيك حاجه تخليك طول عمرك معاق .

السؤال الثالث

ممكن تظهروا في شخصية حد تاني ؟

احنا كل يوم بنتكلم معاكم او بتشوفونا . انا القطه اللى بتبقي تقف تبص عليك . ومش شرط ابقي سوده ممكن ابقي قطتك اللى مربيها .

ممكن ابقي حد غريب قابلك في الشارع خبط فيه . انا ممكن ابقي صاحبك اللى في الجامعه . احنا يمكن نبقي في اي صوره علشان نبقي جنبكم يمكن ابقي الصوت اللى بتسمعه بالليل لطفل بيعيط تفكره فى الشارع أو جارك أو أى بيت جنبك

– لا ده واحد مننا . قولتلك احنا في كل مكان حواليكم

لسؤال الرابع

لو انا قاعد لوحدي وخايف ممكن يحصلي حاجه ؟

دي الفرصه اللى بنستناها كل يوم بناخد الكتير منكم اي حد قاعد لوحده وزعلان وبيفكر او لو عيط دي بتبقي احسن فرصه لينا .. ممكن فجائه تلاقيني حضنك اوديك عالم تاني .

هتبقي موجود في حياتك زي ما انت بس انت اتبدلت بشخص تاني شخصيتك الحقيقه اخدناها بعيد لكن اللى موجود عباره عن جسمك

وحد تاني جواه بيتحكم فيه . يعني تلاقي كتير منكم اصلا مش هما . دول احنا جسمكم اه بس اللى بيتكلم واللى جواه مش هوه حتي اهله ميقدروش يفرقوه لانه بيتعامل بنفس طبعه او حتي نفس تفكيره

بس هوه مش بيبقي هوه . يعني انت ممكن تبقي شخص تاني اصلا دلوقتي غير اللى اتولد بيه يمكن تكون واحد مننا

السؤال الخامس

بتبحوا الضلمه ولا النور ؟

الضلمه غمض عينيك لمده دقيقه بعدها هتشوف نور جي عليك من بعيد او دايره كبيره كده فيها نور وتبداء تختفي لوحده تاني . انت عارف ده معناه ايه .

ده معناه ان فيه مننا كتير اوي في نفس المكان اللى انت قاعد فيه مستنين الفرصه المناسبه

السؤال السادس

الطفل لما بيبقي بيبص كده لوحده علي حاجه وتلاقيه معيط دول انتم صح ؟

ايوه صح الطفل الرضع المولود جديد بيقدر يشوفنا عينه بيبقي لسه مكملتش نموها بيبقي فيها خلل طبيعي بتخليه يشوفنا . ولان اشكالنا بتبقي صعبه جدا وحشه جدا لو اي حد شافنا هيزهل ويفر مننا

الطفل بيستحمل اللى لو شافه حد منكم هيجيله صرع

السؤال السابع

ممكن نشوفوكم علي حقيقكم وايه اللى يخليك تظهر علي حقيقتك لأى حد ؟

لو دخلت الحمام واستحميت بميه سخنه في اي وقت ونزلت علي الارض ممكن في لحظه حد مننا تشوفه قدامك . احنا بنتاذي من الحاجت دي .

او انك تقعد تعيط بليل اوي دي حاجه بتضايقنا جدا ممكن نأذيك بسبب الصوت المزعج اللى بيخرج منك وانت بتعيط .

زي ما قولتلك فوق لو انت خايف دي قوتنا .

وانا بحكيلك دلوقتي بص وراك كده ؟ لو خايف هتشوف منظر يمكن تموت فيها بسببه ولو مش خايف مش هتحس بحاجه اكتر من هوا سخن

السؤال الثامن

ممكن تبقوا اصحاب لحد مننا ؟

كتير مننا اصحاب معاكم فيه منكم كتير بيتواصل معانا وبنشوفه ويشوفنا وبنتكلم معاه وكمان بنساعده احنا زيكم بنحب العلاقات برده وساعات بنكون العلاقات دي غصب عنكم كمان

السؤال التاسع

بتتجوزوا مننا ؟

عندنا نوع من الموضوع ده لو حد مننا شاف انسيه عجبته يمكن يحبها ويجبرها انه يتجوزها مش هيبقي بمزاجها او هيا مش هتبقي عارفه اصلا

بينام جنبها كل يوم وياخدها في حضنه . او حتي واحده من جنسنا تعجبك بواحد من عندكم بتجوزه وبرده بتنام جنبه وتاخده في حضنها

لو بتحس وانت نايم انك في حد جنبك فمتخفش دي جوزك او مراتك ومش هياذيك او ياذيها لانه او انها بتحبكم

وفيه نوع تاني بنتجوز برضا كل واحد من الطرفين لو حد بيفكر في الموضوع كتير وفي الجواز كتير ممكن جدا نعرض نفسنا عليه ويوافق يا ميوفقش ولو وافق بيبقي عايش في سلام

ولو مش وافق .. بيندم انه قال لأ

السؤال العاشر

اوصفلي شكلكم ؟

غمض عينيك دلوقتي وقول ورايا اللى هقوله ده ( اورنعبت بن ملكوت مسكيعقالا)

قولها خمس مرات وانت مغمض عينك . لكن لو مش بتخاف لو بتخاف بلاش لانك اللى هتشوفه مش كويس خالص انت ممكن متبقاش موجود بعدها .

النهرده 12 12 وده اليوم تلاقي المماليك بتاعتنا مع بعض والنهرده بالذات ممكنش تشوف حاجات كتير وبنبقي منتشرين جدا النهرده من اول يوم 12

لحد يوم 21 ولو فكرت تغلط اي غلطه من اللى قولتهملك فوق في الايام دي متلومش غير نفسك .

وإلى هنا وانتهى حوارى مع صديقى العفريت ، وبعد أن استيقظت من نومى قررت أن أدون قصتى مع صديقى العفريت حتى تكون كل المعلومات التى أمدنى بها فى خدمة من أراد معرفة كل شيئ يتعلق بعالم الجن ليتمكن من حماية نفسه وحماية أهله من أذى الجن بمعرفة ما يغضبهم أو يؤذيهم فنحرص على تجنبه حتى نتجنب أذاهم ونحيا معا بسلام فى كل مكان فى بيوتنا أو خارجها